علاش الدولار قاعد يرقى ، و السلع تغلى؟ و المواطن يتمرمد؟
طبعا زي ما قالوا خوتنا اللي يفهموا في الاقتصاد و السياسة.
المشكلة مش في مصرف ليبيا المركزي و لا في المؤتمر و لا في البرلمان و لا الغويل و لا الثني.
و المشكلة مش من تجار الذهب و لا من تجار العملة و لا أصحاب الكوش و لا مهربين الدقيق و البنزينة.
هاذو كلهم عوامل ثانوية تساعد في تفاقم الأزمة لكن مش هما السبب.
السبب زي ما قالوا خوتنا اللي يفهموا في الاقتصاد و السياسة، هما الجضران و الزنتان اللي مسكرين النفط ، و ما حد قادر يقوللهم ثلث الثلاثة كم، لأنهم مدعومين دوليا من قوى كبرى مش من صالحها أن ثورة ليبيا تنجح. و هم عارفين أن ليبيا ما ليهاش مصدر للعملة الصعبة غير النفط.
طيب ، تمام..
باهي، و شن اللي خلى ليبيا ما ليهاش مصدر للعملة الصعبة غير النفط؟؟؟
....
أنت السبب يا فالح.
يا ليبي يا حر يا اللي تقرى في منشوري توا.
أنت السبب لأنك ما تخدمش ، ما تنتجش ، و عقاب الشهر تمد في يدك تبي مرتب.
أنت السبب لأنك ما تعرفش كيف تخدم أصلا ، و ما تعرفش كيف تنتج سلعة أو خدمة قابلة للتصدير.
أنت السبب لأنك ما تعلمتش باهي ، و ما تبيش تتعلم و تتعب روحك و ترهق عويناتك في القراية.
أنت السبب لأنك تفرح لما ولدك ينجح بالغش و انت عارف أنه غير أهل للنجاح ، المهم يحصل شهادة.
أنت السبب لأنك ما علمتش ولدك صنعة ، و بإتقان ، و تبي صغارك كلهم يطلعوا موديرية، و يخدموا تحت المكيفات.
أنت السبب لأنك حتى لما بتغير لامبة في الحوش لازم تجيبلها سطا مصري والا نيجيري، و السطا بيخلص منك بالليبي ، صح لكن الفلوس بتطلع من البلاد كعملة صعبة.
أنت السبب لأنك قاعد تدمر في بلادك بسلبيتك و عدم مشاركتك في أي عمل تطوعي حتى لو بكلمة طيبة.
و أخيرا أنت السبب لأنك ما تعرفش قيمة الوقت، و أن كل دقيقة من عمرك هي جوهرة ثمينة ، كان ضاعت ، معاش تتعوض.
......
طبعا كلامي للمواطن الفالح ، اللي يعتقد أنه مواطن صالح.
أما الفاسدين
مش حيقروا هالكلام أصلا.
مهندس / خالد أبوخبطة
تجمع ليبيا الرخاء
